www.ALBERSABER.com
متحرش بالعقول المغتصبة -- ثورة علي المقدسات و الموروثات

Friday, May 8, 2015

5 أيام بدون فيس بوك


Facebook

بقالى خمس ايام مش بدخل فيسبوك 
رغم ان المعتاد بتاعى انى مابدخلش على الفيسبوك اكتر من ساعه ل ساعتين بحد اقصى فى اليوم ، وأغلبهم بكون بحذف الحسبات الوهمية
وحتى الناس ال معرفهمش ولا حصل بينا كلام قبل كده
وفى خلال سنتين تقريبا حذفت حوالى 2000  صداقة فيسبوكيه (افتراضيه) 
حاليا عندى حوالي 3000 إلا شوى وبصراحه مش فاكر عددهم كام دلوقتى بظبط وبصراحه مش هينفع ادخل اشوف عددهم دلوقتى لانى مش عايز أدخل مراحيض الفيسبوك .

ايوه هو مراحيض بالنسبة لي زى التلفزيون بالظبط الاتنين بيعرضوا حاجات كتير بشكل شبه عشوائى ، الاتنين متعرفش اول ما هتفتحهم هيعرضولك ايه ، ممكن وانت بتقلب تلاقي حاجة عجبتك ولكن معنى دخولك وتقليبك فى حاجات عشوئيه بشكل ده انك مش داخل لسبب محدد ، أنت بس بتضيع وقت ، وأنا عن نفسى مبحبش أضيع وقتى ولهذا السبب نادرا ما اشاهد التلفزيون ولما بحب اتفرج على حاجه بقدر أجيبها من الإنترنت واشوفها ويمكن كمان اقدر اشوف حاجات عن ما أريد على عكس التلفزيون .
لذلك الفيسبوك بالنسبة لى زى التلفزيون ، زيهم زي شخص بيقوم بعمليه الاخراج ودماغك هى المكان ال بيتم فيه العمليه دى ، لذلك انا بحب اختار الحاجه ال هتدخل فى مخى .

المشكله فى الفيس بوك :
- أن الشخص بيدمنوا وبيعتاد عليه بشكل كبير جدا لدرجه 
- أن فى بعض الناس اصيبت بلهوس وأصبحت بتكتب وتنشر حاجات فى غايه التفاهه والسفه ،
- وفى ناس تانى بتصاب بحاله اسهال لدرجه أنهم ممكن يكتبوا أكثر من عشره منشورات فى أقل من ساعه او ساعتين ،
- وفى والناس ال بتسرق أو بتعيد رافع فيديو أو صوره أو post عشان يلم لايكات (اعجاب) وكذلك صدقات جديده أو متابعين .

هو مش عيب انك تحب يكون عندك اصدقاء كتير ده كويس ، ولكن صداقات الفيسبوك هى صداقات وهميه (افتراضيه) ، ما حتي ال المفرود يكون صديق هو عبارة عن مجرد حساب على الفيس بوك :
إما ان يكون حساب يعبر عن شخص حقيقى وفيه بيانات حقيقية و صورة حقيقية ،
أو حساب وهمى يعبر عن شخص يعانى من الخوف ويصل مدى خوف البعض منهم إلى أن يخافوا حتي من ذكر أسمهم الحقيقى !!
أعتقد أن هؤلاء مصابين بمرض نفسى مثل انفصام فى الشخصية ، بحسب كثره تعاملي وتصفحى لهذه الحسابات وجدتهم نوعان :
- إما شخص يخفى شخصيته خوفا من بعض أقربائه او بعض الأشخاص ، ونظرا إلى أن وجهة نظره أو آراءه تسبب خطرا منهم على حياته أو مصالحه ،
- وهناك نوع آخر وهو متعمد أن يصنع حساب وهمى لكى يمارس فيه كل أمراضه العقليه وكأنه شخص يتعامل معك من خلف نقاب لأنه يخشى مواجهتك ولأنه أجبن من أن يواجه حقيقة نفسه .

عموما البعد عن مراحيض الفيسبوك هيرحمك كتير من الأمراض البشريه المنتشرة ، وأعتقد أن وقتى أهم من أن حد يشخ فى دماغى ، ولو حد عايز يقولى حاجه مهمه على عينى وعلى رأسي ، إنما انى اشوف كميه منشورات لتلات الاف غير الصفحات مش هيخلينى أعرف أخبار حد ، ودى من أحد المساوء ، ولكن بشكل عام هى أفضل من أضرار إستخدام الفيس بوك ، عموما عشان أراجع حوالى 3000 صداقة افتراضية عندى ده هيستهلك من وقتى كتير ده غير أكثر من 1000 طلب صداقة وهميه ، وللأسف وقتى ميسمحليش أني أعمل كل ده .

عندى كتابين بقالى أكثر من 3 أسابيع عايز أقرائهم ، ومش لاقى وقت ، وحتى أكثر من مره أكون بقراء أو بتابع حاجه و الأنسة هيباتيا بتكون عايزة تمارس حقها الطبيعى إنها تلعب معايا أو بيا - مش هتفرق كتير - وبالتالى مبعرفش ، ومعنديش وقت للقراءة .

وأعتقد أن حتى لو مش هستخدم الفيسبوك لمدة الساعتين يوميا وعملت فيهم أى شى تانى هيكون أفضل من الإبحار فى مراحيض الفيسبوك ، ولو في حاجه مهمه فعلا فى حد عايز يقولهالك هيكلمك بشكل مباشر أو هيبعتهالك بشكل مباشر ، إنما الحاجه ال بتتكتب بشكل عام دى أكيد ماتخصنيش .

وأعتذر إنى مش هقدر أرد على كل التعليقات يمكن حتى مش هشوفها ولكن إل يحب يقولى حاجه يقدر يقولهالى بشكل مباشر .

رغم أني كنت مشغول اول يومين بس ولكني لقيتها فرصة لتنفيذ ما أريده منذ زمن ، وداعاً فيس بوك .

كتبها ألبير صابر في الجمعة 8 - 5 - 2015 ، نيوشاتيل - سويسرا .

About Us

Recent

Random